د/ مروة مختار تكتب .. ليه بقينا بنحب الوحدة أكتر؟

مش لأن الناس وحشة دايمًا، لكن القعدة اللي بلا أمان أوحش من ألف وحدة. بقينا نحب الهدوء مش هروب، لكن استرداد نفس، ومساحة نسمع فيها صوتنا بعد ما ضاع وسط زحمة الآراء والطلبات والتوقعات.
نقعد لوحدنا عشان نفهم إحنا محتاجين إيه بجد، ومن إيه تعبنا، ومن مين لازم نبعد شوية من غير كره، بس حفاظ. الوحدة دلوقتي مش انعزال، دي مساحة نظيفة نرتّب فيها روحنا ونصلّح اللي اتكسر جوانا في هدوء ومن غير شهود.
يمكن مش بنقفّل الباب عشان نمنع الناس، يمكن بنقفّله عشان نحمي اللي جوّه من الاستنزاف والتكرار. ومش كل اللي اختار الوحدة مكسور، في اللي اختارها عشان يفضل سليم.
إنت بتحب الوحدة… ولا بس بتدور فيها على راحة ما لقيتهاش وسط الناس؟