صرخة رائدات التضامن بالمنيا تعكس معاناة 15 ألف أسرة
تلقت بوابة "التعاونيات المصرية" هذه الصرخة من رائدات التضامن الاجتماعى بمحافظة المنيا لتوصيلها إلى معالى الدكتورة مايا مرسى وزيرة التضامن الاجتماعى ..
" نرجوكم.. وصلوا صوتنا لمعالى وزيرة التضامن الاجتماعى "الإنسانة" ..احنا مش بس 15ألف رائدة احنا 15الف أسرة .. منا المطلقات والأرامل والمرأة المعيلة .. مش عايزين بدلات.. عايزين عقد عمل يحفظ حقوقنا .. احنا موظفين دولة بننزل شغلنا كل يوم .. احنا أكتر حد وقف مع البلد فى أزماتها.. احنا اللى بنادى "لا للعنف ضد المرأة" .. واحنا أكتر فئة بتتعرض للعنف .. احنا بنوعى بالتمكين الاقتصادى للمرأة.. واحنا مش عارفين نأكل عيالنا.. احنا اللى اتعرضنا للظلم.. مضينا على عقد ماكنش فى فرصة حتى نقرأه .. ويا كدة يا بالسلامة.. احنا اللى شيلنا شغل الوحدات على كتافنا على أمل ظروفنا تتحسن.. احنا اللى بنقبض مكافأة 1200 جنيه قد الزيادة اللى الموظفين بيزيدوها كل سنة.. احنا اللى فرحنا بالتأمين وطلع على بند ٩ زينا زى الفلاحين وبائعي الصحف .. احنا اللى الكل فرح بقانون العمل الجديد ومش عارفين هيشملنا ولا لأة بسبب كلمة "تطوع" رغم انه تم ضمنا لفئة العمالة غير المنتظمة.. احنا اللى مالناش حق نطالب بحقوقنا.. احنا اللى فى قلبنا حسرة وفى عيوننا دموع على سنين تعليمنا والشغل اللى قدمناه للبلد بكل حب.. احنا اللى مش لاقيين حد يسمعنا واحنا بنسمع كل الناس وبنحل مشاكلهم .. احنا اللى مطلوب مننا نوعى وكمان نسجل شغلنا على تليفوناتنا الشخصية وباقة نت على حسابنا ونعمل خطوط سير وأوراق وكل ده مقابل ١٢٠٠ جنيه .. احنا 15ألف رائدة اجتماعية قلبنا اتكسر ودموعنا اتجمدت لما استنينا الدعم من وزيرتنا ومالقينهوش.. احنا 15ألف أم وراها أسرة وأولاد ومصاريف ومتطلبات..!!
انتهت صرخة رائدات التضامن بمحافظة المنيا و بوابة "التعاونيات المصرية" فى انتظار الرد من معالى الوزيرة د. مايا مرسى.
